يا (دْبَي) يا زهرة خليج (الإمارات)
ملزوم في موت الفقيده أعَزّيك
(مكتوم) ما ترثيه دمعه وْوَنَّات
لا. لا. ولا ظنّي بموته نواسيك
شيخٍ فَرَضْ قَدْره والافعال الاثبات
في واقِعكْ يشْهَد جديدك وماضيك
رقى بمجدك لين حَد السماوات
طَوَّرْ ثراك وْشَيَّدْ أجمل مبانيك
نلتي بمجهوده شموخ وشهادات
يا قِل والله يا (دبي) من يضاهيك
هذي هي الدنيا حزون وْمسرّات
يومٍ بها تضْحَكْ ويومٍ تبكّيك
الموت كم غيَّبْ قريبٍ من الذات
خذاه في اللحظه ولا عاد يمديك
لو كان ما ودّك ولا شك هيهات
قدر ولا بدّه مع الوقت ياتيك
يا (دْبَي) ما يكفيك ضيقه وْعَبْرات
الله يعينكْ داعي الحزن داعيك
جرحِكْ يبي يبقى برايي سناوات
يا (دبي) وابيات الرثا ما تكفّيك
لو يَرْجِعِهْ يا (دْبَي) حَسْره ودمعات
إن كان دمع الشَّعب عانَقْ شواطيك
يا دانة الدنيا ترى الشيخ ما مات
ذكره بقى عطرٍ يعطِّر أراضيك
عن وصف حزني تقصَرْ أحلى العبارات
لكن عزانا فيه باللي بقوا فيك
(مْحَمَّدْ) و(حمدان) وقت الملمّات
صوارمٍ عن ما يريبك بتحميك
نِدَّرْ على نهجه ونفس المسارات
مشوا ولا تخشين مِقْبِلْ مماشيك
الله يبيح الشيخ مَرّه وْمَرَّات
وتعفو عَنِهْ يا واحدٍ دوم نرجيك