عِزّة نفس

يا عِزّة النفس إنتي راسي ومالي

والاّ البقايا مظاهر ما لها قيمه

ما يشكي الذيب ليل وْوَعْر الِجْبالِ

ضاري على اليوم الاسوَدْ ما شكا ضيمه

ولا يسكن الحرّ إلاّ المرقب العالي

وان ضاق صدره يخاوي بالسما غيمه

لا خير في اللي يبيع النفس بالمالِ

وان ضاعَت النفْس ضاعت ما بقت شيمه

دنياً دنيّه وراها شَرّ واهوالِ

هي (حَيَّةٍ) في عيون الآدمي (ريمه)

ما قِدْ شكيت الدهر واقوال عِذّالي

وْلا هَزّني الخوف مهما زاد تعظيمه

خوفي وشكواي لله يرفِق بْحَالي

النافع الضارّ نفسي بِيْده مْقيمه

ما باقْصِرْ خْطاي لو موتي تهايا لي

ظميان والموت يبقى للشهم ديمه

هذا أنا شامخٍ في كل الاحوالِ

أغَنِّمْ القلب صبرٍ في ملازيمه

يا عِزّة النفس إنتي راسي ومالي

والاّ حياتي بدونك ما لها قيمه