بِكْ من ملامِحْ سِيْدي وْلَفْتاتِه

أعْظَمْ وصوف الطِّيْب يا مَرْبوحه

فِعْلِك يجَدِّد بالفَخر راياتِه

وبيبان قلبك لِلْعَرَبْ مَفْتوحه

عَقْليّتك مِتْبَرْمِجه بْهبّاتِه

وقَلْبِك تشَبَّع طيبته وِوْضوحه

كَمّ اهْلِكَتْ يَدّ الكَرَمْ مَدّاتِه

وانته تسيّدْت الكَرَمْ وِصْروحه

يشوف بك (بو راشد) ابداعاتِه

وِنْشوف بك فارِس فَرَسْه طْموحه

تِنْشاف في سابِع سما هاماتِه

شاعِرْ ويَرْسِم من حروفه لَوْحه

لوْحَة شِعِر مْتَميِّزه بْبَصْماتِه

وْمِن خَطَّها بِيْده غدَتْ مَمْلوحه

(فَزَّاعْ) فيك الشِّعْر يلقى ذاته

قِصَّة غرام الشِّعْر بك مَفْضوحه

كَمْ يعْشَقِك وِيْفاخِرْ فْـ ساحاته

يا مِشْعِلْ الساحه بْكِلّ أطروحه

ما تِنْتقي إلاّ غِزِرْ داناتِه

مَعْك اتّحَوَّل الامسيه لاِصْبوحه

الحَرْف كَنّه نور مِن شَعّاتِه

تدبل حروف النور ساعَة بَوْحه

الشِّعْر بك يا سَيّدي قاماتِه

تجاوِزَت طود الغلا وِسْفوحه

غلاك فينا عَسْكَر بْقوَّاتِهْ

يا مرحبا بْهَذا الغلا وِجْموحه

يا فَخْر قَلْب (دْبَي) يا راحاتِه

يا بَسْمَه لْوَجْه الوطَنْ مَمْنوحه

إعْذِر لسَان الشِّعْر في زَلاّتِه

هَيْبَة شِعِر في حَضْرتِكْ مَمْسوحه

شَيْخ وْسِنَافي وشاعرٍ نَظْراتِه

تَرْجِف لهَا قْلوب وْقِمَمْ مَمْدوحه

هل كَيْف شِعْرٍ توّها خَطْواتِه

تِزْحَفْ على دَرْب الشِّعِر مَجْروحه

من العِذِرْ يا سيّدي لَفْتَاتِه

يا تاج راس الشِّعْر يا مَرْبوحه