يا بَحْر (جِدّه) والمسا مغري وانا فيني كثير
أحمْل تَعَبْ واحمْل عتَبْ واحْمِل بَعْد شَيّ أجْهَلِه
شاعر واعَرْف الفَرْق ما بين المشاعر والضمير
يوم انّ غيري ما عَرَف فَرْق الحنين عْن الوَلَه
انسان واكْثَرْ ما رميت الناس باشيا ما تصير
مهما رمَتْني الناس باشيا ما لها فيني صِله
شِفْني كذا تطعَنّي أصْحابي وانا دايم بخير!!
دايم بخير وْطَعْنَة أصحابي ما هيب المشكلة!!
ما احتاج أوضّح لك ما دام يْقودني سِلْك الحرير
صوب الوضوح اللي كفى غيري فضول الأسئله
واللي تجي مِثْل العِطِر أو قِلْ بَعَد مِثْل العبير
هذيك للأزهار يَمّتها تشير البوصله
هي قِبْلَة الوَرْد الحَمَرْ في (فَيّ) والاّ في (هجير)
والغَيْم يتبعها وَرَاها مِدْبِره أو مِقْبِله
لو بِعْدها لي خَيْر ما ابغي الخَيْر ما في البِعْد خَيْر
ولو قِرْبها لي مَهْزَله أنا اشتريت المهزله
يا بَحْر (جِدّه) وان بغيت الصِّدْق هاك مْن الأخير
أقْفَتْ مراحل عمري وْلا زِلْت نَفْس المَرْحَله!
أعيش نَفْس الوَضْع بالدنيا ومِتْعَلِّقْ كثير
بين التَّعَبْ بين العتَبْ في يْدَيْن شَيٍ أجهله