مَاجُوْر يَا قَلْبِيْ وْلا بَاسْ
ضِرِيْبَةْ شْعُوْر وْأحَاسِيْس
يَا اللَّى تِمُرِّكْ مِثْل الامْوَاسْ
فِيْ هَيْئَةْ هْمُوْم وْهِوَاجِيْس
هْمُوْم مِنْهَا تْضِيْق الانْفَاسْ
تْضِيْق.. وِبْكِلّ الْمِقَايِيْس
وَاحْدَاثْ تَخْفِيْهَا عَنْ النَّاسْ
مِكَانْهَا خَلْف الْكُوَالِيْس
حَسَّاسْ وَاحْبَابِكْ بَلا احْسَاسْ
وَاحْلامِكْ أغْلَبْهَا كُوَابِيْس..!
يِشْبَهْ هِدُوْءِكْ صَوْت الاجْرَاسْ
فِيْ صَوْمَعَةْ (رَاهِبْ) وْ(قِسِّيْس)
وِطْعُوْنِكْ اللَّى بْرُمْح (جَسَّاسْ)
مِنْ كَفّ شَخْصٍ تَحْسِبِهْ (قَيْس)..!