لا تصَدِّقْ يِحِبِّكْ... مِنْ حِكَى لِكْ كَلاَمْ
مِنْ كَلام الْوِشَايه.. ذَاكْ يَكْذِبْ عَلَيْك
صَادِقْ الْحِبّ مَا يَهْدِيْك إلاَّ السَّلامْ
مَا يِغِثِّكْ بِهَرْج النَّاسْ لَوْ كَانْ فِيْك
يَا جِمِيْل الْمِحَيَّا يَا شِبِيْه الْغمَامْ
إنْت يَا اللَّى (عِقِيْق الْقِرْط) لاَيِقْ عَلَيْك
يَا فِسِيْح الْمَحَاجِرْ يَا شِرِيْف الْمِقَامْ
يَا بعِيْد الْمَنَالْ.. الْوَجْد سِرِّيْ إلَيْك
يَا مِغِيْر النِّسَا لَيْن النِّسَا مَا تِنَامْ
مِنْ مَحَاسِنْك.. غَارْ الْوَرْد.. لَوْ هُوْ يِدَيْك
اللِّيَالِيْ سِرَنْ بِكْ قَبل شَهْرٍ وْعَامْ
وَانَا مَا ادْرِيْ عَنْ الأيَّامْ وِشْ هِيْ تِحِيْك؟!
لكن اللَّى مْطَيِّرْ بَعْض شِعْره حَمَامْ
لاجِلْ عَيْنِكْ يِحِسّ احْسَاسْ مَا يِعْتِرِيْك
كَمْ تَحَرَّاكْ هذا الْوَالِهْ الْمِسْتَهَامْ
كَمْ تَحَرَّاكْ جَنْبه يَا بَعَدْ نَاظِرَيْك
يِبْتِدِيْ بِكْ طِلُوْع الشَّمْس فَجْر الظَّلامْ
يِبْتِدِيْ بِكْ وْهُوْ مَازَالْ بِكْ يِبْتِدِيْك
أسْفَرْ اللَّيْل وِالاَّ فَجْر الايَّامْ غَامْ
مِثِلْ وَجْد الْمِسَافِرْ صَارْ وَالِهْ عَلَيْك