الْمِظْلِمْ الضَّاوِيْ..!!

صديقي الْعَابِرْ كبير الهقاوي

                        سَطِّحْ علاقاتك مَعِيْ قَدْر الاِمْكَانْ

لا تْعَلِّقْ آمالك.. وْتَرْسِمْ مَنَاوِيْ

                      أعْجِبْك بَعْض أحْيَانْ.. وَاحْبِطْك أحْيَانْ..!!

أحْيَانْ أشُوْف انّ الْعَرَبْ بِالتِّسَاوِيْ

                      وَاحْيَانْ أجِلّ (فْلاَنْ) وَاهَمِّشْ (فْلاَنْ)..!!

وَاحْيَانْ أحِسّ إِنِّيْ الْمَلاكْ السّمَاوِيْ

                      وَاحْيَان تَنْفِرْ مِنِّيْ الإِنْس وِالْجَانْ

تِصْغَرْ فْـ.. عَيْنِيْ مِعْضِلاَتْ وْبَلاوِيْ

                       وْتِكْبَرْ فْـ.. راسي هَفْوَةْ وْزَلَّةْ لْسَانْ

تفاؤلي.. يَقْنِعْنِيْ الَّلاَلْ.. رَاوِيْ..!

                     وتشاؤمي.. يْصَوِّرْ لِيْ الْغَيْم دِخَّانْ..!!

اللَّى أمَامِكْ شَخْص جِدَّاً غَنَاوِيْ

                    فقير.. نَقْصه زَوْد وِالزَّوْد نِقْصَانْ

له جَانِبَيْن اثْنَيْن مِظْلِم.. وْ ضَاوِيْ

                    إنْسَانْ وِبْدَاخِلْه (مَجْمُوْعَةْ إنْسَانْ)

فِيْ دَاخِلِهْ (مِذْنِبْ) وْ(عَاصِيْ) وْ(غَاوِيْ)

                   وْفِيْ دَاخِلِهْ (مِسْلِمْ) وْ(تَايِبْ) وْ(نَدْمَانْ)!

وْفِيْ دَاخِلِهْ (شَايِبْ) حكيمٍ وْرَاوِيْ

                    وْفِيْ دَاخِلِهْ (طِفْلٍ) شِقِيٍ وْشَيْطَانْ

وْفِيْ دَاخِلِهْ عُوْدٍ مِنْ الياس ذاوي

                     وِمْن الإراده عُوْد مُوْرِقْ وْرَوْيَانْ

وْفِيْ دَاخِلِهْ مَمْلِيْ مِنْ الْهَمّ خَاوِيْ..!!

                      وْفِيْ دَاخِلِهْ خَاوِيْ مِنْ الْهَمّ مَلْيَانْ..!!

وْبَوْح وْقِصِيْد وْفَلْسِفَاتْ وْحِكَاوِيْ

                     أنَا كَذَا إنْسَانْ فِيْ دَاخِلْ إنْسَانْ..!!