يَا صِبَاحْ (الْمُثَنَّى).. والنّدا و(الْفُرَاتْ)
وِافْتِخَارْ الرِّشِيْد.. وْفَزْعَةْ (الْمُعْتَصِمْ)
وِانْبِلاَجْ الصِّبَاحْ.. وْكَرَّةْ الْعَادِيَاتْ
كِلّمَا الْمَوْت نَادَى.. قَالْ الابْطَالْ: سَمّ
عِيْدُوْا الرُّوْح لامَّه قَبِلْ تِصْبِحْ مِوَاتْ
بَعْد مَجْد ٍ، غِدَتْ لِلذِّيْب الاقْشَرْ.. غَنَمْ
وَلّ يَا وَقْت صِرْنَا.. نِسْتِدِرّ الْفِتَاتْ
وْنِحِنْ كَانْ الرِّضِيْع يْنِزّ كَفّهْ.. دِسَمْ
الْعُلا لِلنّفِيْر.. وْسَلَّةْ الْمُرْهَفَاتْ
وْحِرّ لَى هَبّ مَوْت.. يْزِمّ مِرْقَاهْ زَمّ
أيْه يا احْفَادْ هَاكْ الْفَاتِحِيْن الْكُمَاةْ
وْأيْه.. يَا ارْبَابْ هَاكْ الْمِحْبَره وِالْقَلَمْ
إرْجِمُوْا (إبْرَهَهْ) وِانْ هَزّ نَذْل ٍ عِصَاة
إِشْفُوْا غِلّ الْيِتَامَى فِىْه.. وِاسْقُوْه دَمّ
ْ
وِانْ حِكَى كَذْبهم خَلُّوْا الْجَنَايِزْ رُوَاة
تَبّ كَفّ اللَّئِيْم.. وْتَبّ وَجْه الصَّنَمْ
ْ
مِنْ هِنَا.. مَرّ (خَالِدْ) وِاصْهِلَتْ صَافِنَاتْ
وَاشْرَعْ الْمَوْت سَيْفه.. وِالأعَادِيْن يَمّ
مِنْ لِفَى بِالرِّدَى.. رِدُّوْه بَاقِيْ رُفَاتْ
وِاوْرِدُوْه الْحِمَامْ وْرُوْد (عَادْ).. وْ(إِرَمْ)
خَلُّوْا أهْل التِّفَاوِضْ يَرْضِفُوْن الْعِبَاة
شِلِّةٍ (لاءَهَا) ذَلَّتْ.. وْ صَارَتْ (نَعَمْ)
ْ
مَا بِقَى لِلْبِكَا مِدْمَعْ.. وْ نِلْقَى عِزَاة
وْمَا بِقَي لِلرِّجَا فِيْ رَحْمَةْ النَّاسْ فَمّ
ْ
وْيَا صِبَاحْ (الْمُثَنَّى).. صَاحْ شَطّ (الْفُرَاتْ)
مَا لِلانْذَالْ (عِزّ).. وْمَا لِلاحْرَارْ.. (عَمّ)