سلام يا بصمة (دبي) وْوَجْهَهَا المِشْرِقْ سَلام
من قبل ما ابدا بالقصيد وقبل ما ابدا بالكلام
سلام لِكْ مَخْصُوْص يِتْسامى سموّك في سماك
يا الشاهِقْ اللي من عِلُوِّكْ يفتخِرْ فِيْك الغمام
سَلام يا (مْحَمَّدْ إبِنْ راشِدْ) ويكفيني شموخ
لا جِبْت لك طاري على لْساني توشَّحْت الوسام
سَلام والاَّ اقول أبَنْسِجْ لِكْ فريد المفردات
ثوبٍ فصوصه من وصوفك ترتقي قَدْر ومقام
سَلام وافْتَحْ لك قَصِرْ شِعْري وْحِلِّهْ في رضاك
إقْلِطْ بِديْوانه وْقَلِّطْ منزله راس السَّنام
الشِّعْر يا مَنْصَى طموح الشِّعْر يِقْصَرْ بالمديح
لو كِنْت أفَصِّلْ من بديعه بالتِّبِرْ تَفْصِيْل خَامْ
تِتْساقط حْروفي من احْساسي مِثِلْ وَبْل الخيال
وْتَثْري ثَرَى فِكْري نوادِرْهَا وْلاِحْسَاسِيْ حِزَامْ
تخْضَعْ بيوت الشِّعْر هيبه يا الزعيم ابنْ الزعيم
وِتْصَافِحْ الإبْداع في يَمْنى الْوَلَهْ وِدّ وْغَرام
أسْمِكْ تِيَمِّمْه القصايد مِثْلِ وِرَّادْ العدود
والمَدْح رَكْبه يَارِدِكْ وِيْعُوْد لِكْ وِرْده حيام
تِشْتَاقْ لِكْ غِرّ المعاني شوق ما ساواه شَوْق
وْتَاقَفْ لذِكْرِكْ يا سموّ الصّيْت شِيْمه واحترام
إن جِيْت أشَرِّفْ بِكْ حصون الْمَدْح وادْخل باب باب
أحْتَارْ ما ادري وِشْ يجَمِّلْني مَعِكْ يا ابنْ الكرام
أسْرَجْت مِهْرَةْ فِكْر شِعْري وَاتخَيَّرْ بالخيار
وارْهَيْت لكن كل ما تَطْرِيْ رجَعْ عَزْمي حطام
يا فَارِقٍ بالفعل لا طَرَّوا فعول الفارقين
يا وافيٍ فَرْقه يحَيِّرْ واقعه روس العظام
يا معْجِزٍ عَجَّزْت بافعالك من الروس الكثير
يا راس جِسْم الفِعْل يا نوره اليا حَلّ الظلام
اليا وقَفْت اتْجَلِّسْ الواقِفْ ويذعن ما عصاك
واليا جَلَسْت تْوَقِّفْ الجالِسْ ويفْخَرْ بالقيام
مِشْتَاقْ أوَصِّفْ كِلّ مِيْزه فِيْك لكن ما قِدَرْت
يا كبر ضَيْم الشِّعر وان قِلْت الحقيقه ما يلام
بَحْرٍ تلاطَم من سنام الفِعْل وِجْبَالْ الوصوف
تِحْتَارْ فيك أفْكَارْ خَلْق الله وْتَبْصِمْ بالبهام
يا مِذْهِلٍ تَدْهِلْ فعولك بالزمان المذهلات
يا وافيٍ يَنْبِتْ ثَرَى فِعْلِكْ بقَيْصوم وْخِزَامْ
مواقِفِكْ مِنْوه اليا كِبْرَتْ نَهَارْ النايبات
لا احْتاجت اليَمْنى اليسار وْصَارَتْ الْفَزْعه مَرام
يا سَيِّدْ الفِرْسان.. ميدان المعالي والمنال
يا شَفّ هامات الفعول ومنتهى حِلْم الْحِشَامْ
يا مْبَهِّرْ المَدّه سحاب الجود مِيْلاَدْ الغناة
يا قبر حاجات الفقير وْفَقْر هَقْوَاتْ اللئام
يا ظِل ناصيك وْبَرَاده لا شكا حَر وْسِمُوْم
يا جَنَّةْ آماله ملاذه بالمهمَّاتْ الجِسَامْ
يا جاه من لا جاه له يا يِسْر من وَضْعه عسير
يا سَرْمديّ القدر يا رَمْز السموّ وْالاِحْترام
أدري قصيدي ما يوَفِّي قِيْمِتِكْ مَهْمَا كتَبْت
لو كِل بَيْتٍ فِيْك ينْخَاني ويجهر للأمام
يا أوَّل أطماع القصيد وآخر أطماع القصيد
سلام يا (مْحَمَّدْ إبنْ مَكْتُوْم) في مِسْك الختام