قِلْتي عَلَيّ اصْبر ولو بعض الايَّام

واللى تباه يْصِيْر يا (عْبَيْد) بَيْصِيْر

من يومها وانا ابْصِرْ الحِلْم قِدَّامْ

حِلْمٍ حقيقي ما يبى حسن تفسير

شوقي لك أعْظَمْ مِنْ عَنَا بِعْد وِهْيَامْ

واطْهَرْ مِنْ النّسمه وصوت العصافير

وْحِبِّيْ لِكْ أكْبَرْ من كِبر حب الاعْلام

(مَجْنون ليلى) و(عَنْتَرْ) و(سالم الزِّيْر)

يا ليتني من يَقْظتي أقْدَرْ آنَامْ

وانام حَتَّى انّك تصَبِّحْني بْخَيْر

تَصْبِيْحِةٍ ما عانقت كل الانام

إلاَّ أنا.. وْهِيْ مِنْك يا غايتي غَيْر

وَعْدِكْ زمانه هَل لِلّى شِقَى وْهَام

في عَالَمِكْ ولا يطيق المعاذير

بكْرى على اعْتاب المواعَدْ من اعوام

بكْرى عسى تَشـْرِقْ لشوفك تباشير

تلطف بحال اللى كما حال الايتام

إنْ ما مِدَاكْ الصبْح لا يْفوتك عْصَيْر

إلْحَقْ قَبِلْ ما الشَّمْس تَغْرب بِالاحْلام

أبْغي الوضوح ولا اقبل بْأيّ تَبْرير