كِلّ مَا ذَعْذَعْ نِسِيْم وْسَالْ سَيْل وْلاحْ بَارِقْ
جَتْنِيْ اللَّى تَخْتِلِطْ مَعْ زَيْنَهَا الطَّاغِيْ عِذُوْبه
بِنْت فِكْرٍ تَسْرِقْ الألْبَابْ وِتْجِيْب الْبِيَارِقْ
فِيْ ذَرَاهَا كِلّ بَيْتٍ يَطْرِبْ الشَّاعِرْ تِنُوْبه
يَا حَبِيْبِيْ وِالدِّرُوْب اللَّى بِدَايَتْهَا مِشَارِقْ
تِنْتِهِيْ لا طَاحْ قِرْص الشَّمْس وَابْدَا لِكْ غِرُوْبه
وَاللّه إنِّيْ مَا كَرَهْت إلاَّ اللَّقَا عِقْب الْمِفَارَقْ
سَاعِةٍ تَمْشِيْ دِقَايِقْهَا مَعْ اللَّيْل مْغَصُوْبه
يَوْم لَدَّيْت النِّظَرْ وِعْيُوْنِكْ النِجَّلْ تَغَارَقْ
رَاحَتْ ضْلُوْعِيْ حِطَامْ وْضَاقَتْ الْبِيْد الرِّحُوْبه
لا تْعَلِّقْنِيْ بِغُبَّةْ مُوْقِكْ وْعَيْنَيْك غَارِقْ
وِانْت ذَنْبٍ مَا قِدَرْ قَلْبِيْ مِنْ اللَّهْفَهْ يِتُوْبه
إقْتِلْ الصَّمْت وْتِكَلَّمْ دَامْ غِصْن الْحِبّ وَارِقْ
لَوْ يِمُوْت الْحِبّ رَاحَتْ مِعْظَمْ عْرُوْقِيْ شِحُوْبه
صَارْ حِبِّكْ مِثِلْ بَيْتٍ يَحْسِبِهْ رَاعِيْه فَارِقْ
كِلّ مَا عَادْ النِّظَرْ فِيْ حَبْكِتِهْ زَادَتْ عِيُوْبه..!!