شعر: سلطان البطر
يَا جِمِيْل الصَّبِرْ توِّيْ فِيْك تَوِّيْ
عَنْ مِكَانِكْ لا تِرُوْح وْلا تِغَادِرْ
مَا خَلا مِنْ فِتْنَةْ الْعِذَّالْ جَوِّيْ
رَغْم تِعْدَادْ الْمِوَارِدْ وِالْمِصَادِرْ
مَانِيْ أدْرِيْ لا عِدِمْتِكْ وِشْ أسَوِّيْ
لا بِدَرْ مِنْ هَبَّةْ النَّكْبَا بُوَادِرْ
سَاتِرٍ دُوْن الْعَرَبْ ضَعْفِيْ وْقُوِّيْ
فِيْك وِالاَّ الرَّاسْ مِمَّا جَاهْ سَادِرْ
الضِّعِيْف يْدَيْه تَبْغِيْ مَوْت ضَوِّيْ
وَآنَا اعَرْف ايْدَيْه وَادْرِيْ وَيْن حَادِرْ
يَنْقِصَهْ شَي ٍ كِثِيْر مْن التَّرَوِّيْ
لاجِلْ يِفْهَمْ وِشْ وَرَا صَفّ النِّوَادِرْ