عاني لروما بأعواني وفرساني

منْ بيتْ مَكتومْ نادتني بلادْ الرُّومْ

ومنْ دَوَّرْ الـمَجْد لازِمْ لأجلهْ يعاني

عَ الأوِّليِّهْ ينافِسْ خيلهمْ مَلزومْ

أسرَجْتْ عَزمي قَبِلْ ما أسرجْ حصاني

وضَمَّرِتْ حَظِّي لأجلْ يومٍ شبيهْ اليومْ

ومنْ كانْ يرضىَ ينالْ المركزْ الثَّاني

غيري وأمَّا أنا آحبْ الأوَّلْ دومْ

ما أرضىَ بغيرهْ وهذا طبعي وشاني

عليهْ ماخذْ وصِيَّةْ جَدِّنا مَكتومْ

حِبْ البطولهْ سِكَنْ دَمِّي وشِرياني

بينْ التّرايبْ ومِنْ أجلهْ أعافْ النّومْ

و آحِسْ بالخيلْ تِشْبَهْ بعضْ خِلاني

فيها الكرامَهْ وفيها المرجِلهْ واللِّومْ

ويومْ إجمعوهنْ ونورْ الصِّبحْ ما باني

والرِّيحْ عاصوفْ وأمطارْ وسوادْ غيومْ

نَوَّرْ طريقي بتفكيري وإيماني

وعَزمٍ على العزْ بهْ عزَّةْ عِزيزْ عزومْ

وإبيَضْ وَجهْ البشايرْ منهْ وافاني

بياضْ حَظٍّ وأبيَضْ بهْ بياضْ علومْ

أكَادْيانْ الذي أكَّدْ بتبياني

فوزٍ أكيدْ ومِاكَّدْ ثابتْ ومَرسومْ

ذِكرهْ مِخلّدْ بفيرونا ولاكاني

مثلهْ بها وخالدْ ليومْ الحساب يدومْ

والفوزْ أهديهْ منْ روحي ووجداني

إلى خليفهْ بتقديرٍ وحَبْ خشومْ

وشعبْ الإماراتْ منْ قاصي ومنْ داني

عساهْ في أمنْ يحيا مْكرَّمْ ومَحشومْ