"رجـمْ عـالي".. قصيدة لـ محمد بن راشد
نشر صاحب السمو الشيخ محمد بن راشد آل مكتوم، نائب رئيس الدولة، رئيس مجلس الوزراء، حاكم دبي، رعاه الله، ، قصيدة رجم عالي على حسابه في "انستغرام" قال فيها:
فوقْ رجمْ المرجلِهْ شَبِّيتْ ضَوِّي
رجمْ عالي لي مضَيِّعْ يهتدي بِهْ
وأرقِبْ الأيَّامْ تَجري منْ عِلِوِّي
واللِّيالي في تِقَلِّبْها عَجيبهْ
وماخفاني شَوُ أريدْ وشوُ أسَوِّي
لأجلْ ناسي أحملْ حمولٍ تعيبهْ
مرتفعْ فوقْ السِّما السَّامي سموِّي
ساميٍ بأفكارْ للعاقلْ تِشيبهْ
أسقيْ اللِّي بهْ عطَشْ منْ فيضْ نَوِّي
وعادتي هذي تَرَىَ ماهي غريبهْ
خذتَها عنْ والدي ما هيْه تَوِّي
وهوهْ خذها عنْ أبوهْ وعنْ قريبهْ
وبي منْ أشواقْ العنا نارٍ تِكَوِّي
جَمرَها الوقَّادْ محمَرٍّ لهيبهْ
منْ حرارةْ جَمرها اللاهبْ تِشَوِّي
في اللَّحَمْ تنضيهْ بالنَّارْ وتذيبهْ
وكَنِّني ذيبٍ منْ الشِّدِّهْ يعَوِّي
العشا فاتهْ ولا حَدٍّ يثيبهْ
كَنْ صوتِهْ وهوهْ في الظَّلما يِدَوِّي
نَدْبَةْ شحوحٍ يشنُّونْ الحريبهْ
يا وليفي لي غدا كنِّهْ عدِوِّي
منْ طعونٍ منَّها روحي عطيبهْ
كنتْ أظنِّهْ قاصدٍ يبغي يِلَوِّي
وأثْرَهْ الخنجرْ ومعلوقي طليبهْ
ما أدري منهو غَيَّرَهْ جَوَّهْ وجَوِّي
حدِّ عندهْ ساعيٍ عنِّي بغِيبِهْ
وبالعجَلْ خذني وما عندهْ تِرَوِّي
والعجَلْ دايمْ يعقِّكْ في مصيبهْ
صارْ لحبالْ الوَصِلْ عنِّي يطَوِّي
وقمتْ ألومَهْ خايفْ إيضَيِّعْ نصيبهْ
وقلتْ لهْ حاذرْ أنا لأجلكْ دنوِّي
وإلاَّ أنا إنْ سرتْ فالرَّدِّهْ صعيبهْ
شفتْ منِّي رحمتي ولوُ شفتِ قوِّي
كانْ هَلَّتْ دمعتكْ تجري سكيبهْ
صافيٍ لكْ بالصِّفا الصافي صِفِوِّي
صفوْ مصْفايْ العِسَلْ ما شَيْ يعيبهْ
وإكتشَفتْ أنِّكْ علىَ شِدَّةْ هِدِوِّي
تحرقْ أعصابي بأسبابٍ مِريبهْ
عايشٍ مَعْكْ بحضوري وبخلوِّي
ماخليتْ إلاَّ بخيالكْ أختلي بِهْ
بسألِكْ إنْ كنتْ للفكرَهْ تضَوِّي
عنْ شبيهٍ للذهَبْ منْ نفسْ طيبهْ
لهْ تعافْ القُوتْ ما تدري إشْ تسَوِّي
وإنْ تنادي يسمعْ الصُّوتْ ويجيبهْ
وإنْ تِفِضْ الخَتمْ يدنيكْ الدِّنِوِّي
الجوابْ يكونْ في القَبْلي تصيبهْ
