في أخي وعضدي ورفيق دربي بو خالد
"شيخ الشباب" .. قصيدة لـ محمد بن راشد
روحْ الشَّبابْ إبْها وقُودْ العزايمْ مِتْحَفِّزهْ ووقتْ العطا مِستِعِدِّهْ
إنعِدَّها لأجلْ الأمورْ العظايمْ لا تخافْ منْ مخطِرْ ولا تخافْ شِدِّهْ
حِرَّهْ ومندَفْعِهْ تقِصْ الصَّرايمْ الشُّوكْ منْ قِوَّة وحاها تِحَصدهْ
إتدَوِّرْ الكايدْ ما تَبغي الولايمْ سيلٍ جرىَ في ليلْ ماشَيْ يحدِّهْ
بها طموحْ وعزمها دومْ قايمْ ولا تحاتي للأمورْ المِلِدِّهْ
وشبَّاننا إبهمْ ننالْ الغَنايمْ همْ للوِطَنْ حِصنهْ وهمْ طيرْ سَعْدهْ
يا كاتبْ التَّاريخْ سَجِّلْ علايمْ مِيِّهْ علىَ مِيِّهْ لمحمَّدْ وجندهْ
شيخْ الشَّبابْ برغمْ حاسدْ ولايمْ بهْ نَتِّقي غدرْ الزِّمانْ ونِصِدِّهْ
بهْ منْ فِكِرْ زايدْ شديدْ الفهايمْ وبهْ منْ شبابهْ قِوْ باسهْ وجِهدهْ
وفَضلهْ وجودهْ لكلْ عاني وشايمْ وحِلمهْ وعلمهْ وكلْ ما كانْ عندهْ
وشكلهْ وصوتهْ وإحتمالْ الجسايمْ وضحكهْ وتقطيبهْ بمزحهْ وجِدِّهْ
حكيمْ في حكمهْ وللحكمِ رايمْ وحكومتهْ منْ حكمتهْ مِستمِدِّهْ
نمضي معاهْ ودومْ عندْ اللِّزايمْ ما نخالفهْ أمرهْ ونوفي لعَهدهْ
عليهْ محسودينْ والدَّهرْ نايمْ وبلادنا منْ زينها تقولْ وَردهْ
مادامْ فينا ما نشوفْ الهزايمْ هوُ جيشْ كاملْ يهزمْ جيوشْ وحدهْ
ومادامْ فينا ما نشوفْ الظلايمْ بالعدلْ نَهجهْ ودومْ للعدلْ قَصدهْ
ومادامْ فينا ما نشوفْ الغرايمْ جودهْ بحَرْ طامي ولا شَيْ قَدِّهْ
وإذا الأمورْ إتْعَقِّدَتْ بالعتايمْ إيحلِّها م الفهمْ عقدهْ بعقدِهْ
شيخْ الشِّبابْ وسيِّدْ الوقتْ دايمْ جيدومنا ولكلْ عادي نِعِدِّهْ
أسمهْ تِعَدَّىَ نايفاتْ الغمايمْ عِضدي محمدْ دامْ عزِّهْ ومَجدهْ
شعر: الشيخ محمد بن راشد آل مكتوم
