شعر: وحيدة السعودية
حَدِيْث الْعِيُوْن
إيْه أحِبِّكْ قِلْتَهَا مَلْيُوْن مَرَّهْ
بَسّ مَا بَانَتْ.. كَلامِيْ وِسْط عَيْنِيْ
مَا دِرَيْت النَّفْس لاَ مِنْ جَاتْ حِرّهْ
سِرَّهَا يَبْطِيْ مَعْ الْحَسْره دِفِيْنِيْ
يَا حَبِيْبٍ صَافِيْ الأزْمَانْ غَرَّهْ
مَا سِمَعْ صَوْتِيْ وْلا جَابه حَنِيْنِيْ
إيْه أحِبِّكْ وِالْهِوَى مَدِّهْ وْجَزْره
تَوَّهْ الرِّبَّانْ فِيْ رَجْوَى السِّفِيْنِيْ
قِلْت أحِبِّك وِانْثِنَتْ لِلْقَاعْ سِدْره
وِارْتِوَى شَوْك الْفِيَافِيْ مِنْ وِتِيِيْنِيْ
فِيْ حَيَاتِيْ صِرْت لِيْ فِكْره وْسَكْره
أنْتِشِيْ بِكْ وَاحْتِوِيْك وْتِحْتِوِيْنِيْ
وِانْت يَا مِتْجَذِّرٍ بِيْ مَدّ جِذْره
يَمّ غَيْريْ وِشْ تَبِيْ مِنِّيْ وْفِيْنِيْ
إيْه أحِبِّكْ صِرّ هذَا الْهَرْج صِرّهْ
لا يِبَيِّنْ بَسّ مِنْ بَيْنِكْ وْبَيْنِيْ
وِالسَّرَابْ اللَّى وَرَاهْ الدَّرْب عَثْره
مَلِّتِهْ رِجْلِيْ وْيِبْسَتْ بِهْ يِدَيْنِيْ
وْكَانْ أنَا نَفْسِيْ مَعْ الْعِشَّاقْ غَرَّهْ
أبْجِدِيّ الْحِبّ خَطَّهْ فِيْ يِمِيْنِيْ
حِبِّنِيْ مَرَّهْ وَانَا مَلْيُوْن مَرَّهْ
قِلْت أحِبِّكْ.. شُوْفَهَا فِيْ وِسْط عَيْنِيْ
