فَلَّةْ جِدَايِلْ

ت + ت - الحجم الطبيعي

يِفِلّ الْوَجْد مَطْوِيّ الكلام وْيِنْتِثِرْ قَافِيْ

وْيِضِجّ أقْصَى حَشَايْ و لا سِمِعْتِهْ مَا تِجَاهَلْتِهْ

 

أنا لا مِنْ تِمَدَّدْ صَوْت آهَاتِيْ عَلَى شْفَافي

أقول اللَّي من العام أبْغِيْ آقوله.. وْلا قِلْتِهْ

 

أحِسّ إنِّيْ تِوَسَّدْت الْوَرَقْ وَاحْزانِيْ لْحَافي

ثقيل أكْبَرْ جروحي يَوْم مَرّ وما تِثَاقَلْتِهْ

 

دِخِيْلِكْ يا الْيَرَاعْ اللَّي خَذَا حِبْره مِنْ اطْرَافِيْ

دخيلك لا تبوح إلاَّ بْجَرْحٍ ما تَحَمَّلْتِهْ

 

حبيبي والعمر راح (أسْمنه) مِنِّيْ وانا غافي

ولولاك انْت في عيني أنا عِمْرِيْ (تَهَازَلْتِهْ)...!

 

تناشِدْني عَنْ الخافي.. لِكْ اللّه ما بِقَى خافِي

أنَا صدري وِقَعْ بِعْيُوْن خَلْق اللّه.. وْلاَ شِلْتِهْ

 

أنا وِدِّي أطَاوِلْك الْفَرَحْ يا الْوَاصِلْ الْجَافِيْ

ولكن كيف أطاوِلْ غَيْرِيْ اللَّي مَا بَعَدْ طِلْتِهْ..!!

 

بقايا ما بِقَى قَلْبٍ حزين وْعَاشِقٍ وافي

يِحِبِّكْ كِثِرْ مَا هُوْ كان عَاقِلْ وِانْت هَبَّلْتِهْ

 

كِثِرْ مَا فَلَّتْ الرِّيْح: الْجِدَايِلْ وِانْتِثَرْ قَافِيْ

وْقِلْت اللَّي من العام أبْغِيْ آقوله.. وْ لاَ قِلْتِه..!

Email