حمدان بن محمد: يوم اصـهـلت خيل الـمعاني قالت ســلام
نشر سمو الشيخ حمدان بن محمد قصيده على حسابه في إنستغرام قال فيها:
يوم اصـهـلت خيل الـمعاني قالت ســلام لك يـا (مـحـمـد النابـوده )
إطلع معي فـوق السحاب نسـولف وكـلـمات من مثـلي تجي مـعـدوده
ويـعـدّها الــروّاي كــلـمـه كــلـــمه مابـه ولا كـلـمه ما هي مـقـصـوده
كلُّ ذوي نـعـمـه بنـعـمـه يُـحـسـد وانا زعـيـم الـعـالـم الـمـحـســوده
عسى فـعـولي في عـيون امثـالك مـقـبولـه وْمـشـكـوره وْمـحـمـوده
ذكـرت ( عـاد) وقـلت سـبحان الله وش صار فـي عاده وفـي ثـمـوده
الكـبر يـهـدم والـتـواضــع يـبـني والوصل يحيي والهجر وش فوده
مـضـيّـع الـثروه .. محـب الـثـروه كـنـّـه يــدوّر حـاجــةٍ مـفـقـــــوده
واللـي مـا يـاخـذ عـمره مْن أيّامه والا بـتـاخـذ من جـسـده الــدوده
من كـثر ما كـفـّه تـجي م الـمـدّه وينام وكـفـوف الـسعـد ممــدوده
ومـانـقـصـنا لامـرئ مـتـصــدّق قـل للـزهـيـد ونـفـسـه الـمزهـوده
لـو تـربـط الاجـســام بالأفـعـالي لـقـيـت أفـكـار الـعــرب مـعـقـوده
قد يكـبر فـ عـينك كبـير بحجــمه أو يصـغر فـْ عينك صغـير بعوده
أكبر مافـي عـين الفـقـير الدرهـم اللي رضـا بحـظوظـه الـمـقـروده
وأصغر مافي عين الغني الحاجه لو انـّها كـبـر الـجـبـل مـشهــوده
والانسـان يولـد طـفل مالـه حيله مـولــود وايـــامـه مـعـه مـولـــوده
يـهـز بـزنــوده ركــــون الـــدنـيـا عايش على ذكرى فـعول جدوده
وهو عن جـدوده مـقـصّـر فـعـله لو طـلـّع بـوجــه الـزمان زنــوده
من راح من عـمـره ثـلاث اربـاعه قـعـد يـفـكّـر فـي الـقـبر ولـحـوده
ولا جـلـس تصـعـب عليه القـومـه وان قـام كـفـّه بالعـصا مـسنوده
الـمـوت واقـع .. والـمـقـدّر واقـع والـناس لو طـال العـمر موعـوده
مقدام .. من خلا الرجال اخلافه وينقاد .. لي خلا الرجال تـقوده
قــدّام لا بـو الـخـطـوه الـخـوّافـه ولا ابـوه قـلـبٍ ما يحـث عْـضـوده
كم رجـل بـاروده حـمى من دونـه وآخـر حـيــاتـه يـذبـحــه بــاروده
والناس عن شوف الصحيح الجارح مــصــــدّده وعـيـونـــهـا مـرمــــوده
عـسى عـيوني عـن حـقايق غـيري ماهي بـمـرمــوده ولا مــصـــدوده
هي هكـذا الـدنـيا ، وذي لـعـبـتـها فـ ايّـامـهـا واحـداثهــا الـمعـيـوده
ضـلـع الـشـمـوخ مـتعـّـب الـرقّايه نـزولـه اهـون وايـد مْـن صـعـوده
لو ان ذا الـدنـيـا ما فـيها نـاقـص ما كـان راعـي الـزود شـفـنا زوده
هـذا شـعـور الـشاعـر اللي غـنّى بعـيد عن عيـن الغـضي وخـدوده
ذيـبٍ عـوى من فـوق ضـلـع عـالي صـداه ياصل فـي الجبل ببـروده
عسى عـواه إذا عـوى مـن ضيـقه ياصـل سموع ( محـمّد النابـوده)
