مثله فِ دنيا الناس ندرهْ

بمناسبة عام الشيخ زايد بن سلطان آل نهيان، طيب الله ثراه، وتغمّده بفضله ورضوانه وأسكنه فسيح جناته

 

رحْماتِ تتنـزّلْ عَ قبرهْ

               في صبحه وْعصره وأماسيهْ

وانوار تاظي له مقرّهْ

              تازم تشعشعْ من حواليهْ

وملايكِ الرّحمهْ تِبرّه

            تبسِطْ له الْخير وتباريهْ

ومايٍ منِ الجنّهْ بكثرهْ

            ينزلْ على اترابه ويرويهْ

وكوثر عَذِبْ ينهلْ قطرهْ

           يصبّ من حوله وْاعاليهْ

لي زايدٍ بالفضلْ برّهْ

           ولي باسطِ اكفوفه وْاياديهْ

ينفحْ شرات اكمامْ زهرهْ

          ينثّ بالأفضالْ لي فيهْ

حتى غدا فِ الناس عصرهْ

          بدرٍ منوّرْ في دياجيهْ

ماله أبدْ في يوم كرّهْ

          عصرٍ تفرّدْ في معانيهْ

لي من ذكرته تْهل عبرهْ

          حيّهْ عدد مَ الورقْ تنعيهْ

يندى لساني بوصف وَطرهْ

         واسمهْ على اشفاتي وطاريهْ

ما مِلْ مِن الطافْ ذكرهْ

         دَينٍ على نفسي وأدّيهْ

مثله فِ دنيا الناس ندرهْ

        ما ينحصلْ مثلِه وْشراويهْ

ياكم علينا يديرْ فكرهْ

       مثلِ الذي يْداري أهاليهْ

كاينْ لنا فِ الليلْ قمرهْ

       تاظي لنا دروبه ومساعيهْ

كم فك منْ شدّات عسرهْ

       وكمْ للشعبْ حقّقْ أمانيهْ

حتى اشتهر فِ الخلق شهرهْ

      فِ الشرقِ وجنوبِ وشماليهْ

واصبحْ فِ عقدِ الخيرْ درّهْ

      ماله وبي أبداً يساويهْ

مذكور فِ التاريخْ خبرهْ

      كمْ خلّد افعاله وْمباديهْ

واضحى لكلّ الجيلْ ذكره

      مثالِ يتجدّدْ لتاليهْ

مغرمْ بفعل الزينْ دهرهْ

       كم سالِ بالمعروفْ واديهْ

يفعلْهِ في سرّه وجهرهْ

      وفي كلْ زمنْ تبقى أثاريهْ

غالي فِ ساحِ الناسْ سعرهْ

      لي ماله اشْباهٍ تكافيهْ

مفطور عَ الهمّاتْ فطرهْ

      ورثٍ منتّبْ من أهاليهْ

يا بازِ متربّع عَ وكرهْ

     يْحرسْ حمى داره ويحميهْ

وكيدِ العدو ردّه فِ نحرهْ

      حتى غدا بذلّهْ معاديهْ

خلّفْ لنا للعينْ قرّهْ

      خليفه وِاخوانِه وْتواليهْ

انعمْ بهم مليونْ مرَّهْ

     إبهمْ نِفاخرْ وِبْهم انتيهْ

أخلاقهمْ فِ الناسْ درّهْ

     كالوردِ فِ البستانْ يزهيهْ

عهدٍ لهمْ ما يجفْ حِبرهْ

      ما يختلفْ حاضرْ وماضيهْ

في كلّ وقتِ يزيدْ كِبرَهْ

      حتى غدا كالطّودْ عاليهْ

نَتلي العَهِدْ ابصدقْ نبَرهْ

      واذا دعانا الخطبْ لبّيهْ

نَصلى العدو ونْرِدْ غَدْرهْ

     ونَفدي الوطن بالرّوحْ نَفديهْ

ونكون فِ الشدّاتْ جمْرَهْ

     انزلْزلِ الباطلْ ونرْديهْ

وياما الوَلا انزيدْ قدرَهْ

    ونرفعْ مقامه وْنحتفلْ بيهْ

لي نهتدي بشعاعْ بدَرهْ

     في ظلمةِ الليلِ وْدياجيهْ

ونقطفْ من الأشجار ثمرهْ

     ونسرحْ ونمرحْ في مناحيهْ

والأمن متحقّقْ بكثرَهْ

     وامانِ ساري في مياريهْ

ضاربْ فِ أرضِ الحب جذْرَهْ

     ما يْزعِزعهْ مِ الرّيحْ عاتيهْ

لهْ فِ التطورْ زودْ وفرهْ

     شيّ ٍ عجيبٍ في نواحيهْ

واللّي تحقّقْ شيْ طفرهْ

     فوقِ الوصفْ شوطٍ يعدّيهْ

يلفت من الأذهانْ نظرهْ

    يا ربّ ادّومَهْ وِتبقيهْ

ذكرى فراقَهْ مولْ مرّهْ

    عَ اقلوبِ اشْعوبه وْمحبّيهْ

كمْ ذا غدتْ فِ الوقتْ عبرهْ

    وتجسيد حبٍّ صادقٍ فيهْ

أدعو لِهِ المولى يسرّهْ

    ويفرّحه اْبفضلهْ ويعطيهْ

إمنِ الرّضى والعفو واجْرهْ

    شيّ ٍ عميمٍ بهْ يواليهْ

 

تابعوا فكر وفن من البيان عبر غوغل نيوز